About

చూడలేదు కదానని , రాత్రి కురిసి వెళ్ళిన సౌందర్యపు ఝడిని , అల్పమైనదని అనేసెయ్ గలమా ...

Monday, 28 May 2012

ఆకుపచ్చటి జ్ఞాపకాల ఇంద్ర ధనుస్సు ...!

సరి కొత్త కాపురం  
హాల్లో చాప 
చాప నిండుగా పుస్తకాలూ 
గాలి కెగిరే కాయితాలూ 
కావాలని కూరుకుపోయే మనసూ ,బుద్దీ 
మగ కాఫీ 
అప్పుడప్పుడూ గైడ్ వేసే నాలుగు అక్షింతలూ 
అందమైన యూనివర్సిటీ 
తెలుగు డిపార్ట్మెంట్ ఫస్టూ ,హ్యుమానిటీస్ సెకండూ 
వెరసి ఆకుపచ్చటి జ్ఞాపకాల ఇంద్ర ధనుస్సు నా ఈ పుస్తకం

[నా పీ హెచ్ డీ పరిశోధన 
''తెలుగు ముస్లిం రచయితలు -సమాజం-సంస్కృతి''
 .దానికి మంచి కాలం ఎప్పుడొస్తుందో మరి  :))]


పి .ఎస్ : హైదరాబాద్ లో చదువుకున్నన్ని రోజులూ మా నాన నేనెప్పుడు ఇంటికి వెళ్లాలనుకున్నా రాత్రంతా నెల్లూరు నుండి ప్రయాణం చేసి హైదరాబాద్ కి వచ్చి మళ్ళీ నన్ను తీసుకుని రాత్రంతా ప్రయాణం చేసి నెల్లూరికి తీసికేల్లెవాడు. అమ్మాయినని కాదు .అబ్బాయిలకంటే అపురూపమని.
ఎం ఫిల్ డీటీపీ నెల్లూరులో చేయించాం
మా నాన  అంతా పూర్తయ్యాక నన్ను షాప్ కి తీసికెళ్ళాడు.అయినా తిరిగొచ్చేసరికి రాత్రి పన్నెండయింది .మరుసటి రోజు కొత్త ఏడాది .నేనూ మా నాన ఆ చీకట్లో వాహనాలు లేని రోడ్ల పై కబుర్లు చెప్పుకుంటూ నడవడం ఓ జ్ఞాపకం .
 
ఎం.ఫిల్ మీ గైడెన్స్ లోనే చెయ్యాలనుంది అంటే నను మన్నించి కాలేజ్ కమిటీ ని ఒప్పించారు కే కే ఆర్ సర్.వారు నాకంటే
నాలుగాకులు  ఎక్కువ మొహమాటస్తులు .మొత్తం పరిశోధనలో నేను గైడ్ ని కలిసిన రోజులు చేతి  వేళ్ళకి కూడా సరిపోనన్ని రోజులు.అయినా ఈ పరిశోధన వారి
మార్కు పరిశోధన.అదో జ్ఞాపకం.

కొత్త కాపురపు తొలి రోజులు .అప్పుడే మా మావ గారు రిటైరై  కొడుకు కి ఒక స్కూటర్ కొని పెట్టారు .
ఆ కొడుకు ఆ స్కూటర్ పై నన్ను రత్న మాల,వేణు గోపాల్,సీఫెల్ సభలూ ,లైబ్రరీలూ ఒకటేమిటి తెగ తిప్పాడు ఈ పరిశోధన కోసమని .విసుగనేదే వుండదు బంగారానికి అప్పటికీ ఇప్పటికీ ...అదో జ్ఞాపకం .

అప్పటి వరకు నాకు స్కూటర్ ఎక్కడం అనుభవమే లేదు .మొదటి సారి బోల్డు సిగ్గు పడుకుంటూ
ఆ నీలం రంగు స్కూటర్ ని ,నీలం రంగు చుడీదార్లో వున్న నేను యెట్లా కూర్చోవాలో తను చెప్తే సిగ్గు పడుకుంటూ 
కూర్చున్నాను .ఆ తరువాత అది నాకు బోలెడు లోకాలని చూపించింది .అదంటే నాకు అలవిమాలిన ప్రేమ.అందుకని దాన్ని బద్రంగా దాచుకున్నాను మా ఇంట్లో .అదో జ్ఞాపకం .

ఏదైనా రాసిన తరువాత దాని మొహం చూడాలంటే ఎందుకో చిరాకు నాకు .అందుకే ఇది మార్పులూ  చేర్పులూ చేయని అప్పటి పరిశోదనే . పబ్లిషర్  అచ్చు తప్పులు  చూడమంటే నా వల్ల  కాదంటే కాదనేసాను. వారే  ఆ పని చూశారు.అదొక  మంచి స్నేహపు జ్ఞాపకం .

ఈ ఇంద్ర ధనస్సుకి రంగులనిచ్చిన జ్ఞాపకాలివి  ! అందుకే ఈ పలవరింత !

5 comments:

వనజవనమాలి said...

అపురూపమైన ఆకు పచ్చని జ్ఞాపకాలని ప్రోది చేసి పంచుకున్నారు.
సామాన్య గారు..చదువుతుంటే యెంత బాగుందో..! మీ అక్షరాలలో దృశ్యాలను చూసాను నేను. చాలా బాగున్నాయి అలాటి జ్ఞాపకాలు వసివాడకుండా హరిత వర్ణంలోనే.. ఉండనీయండి.
లవ్లీ షేరింగ్! మీ పరిశోధనలో మీకు సహకరించిన కిరణ్ గారికి అభినందనలు.ధన్యవాదములు చెప్పండి.
అంటరాని వసంతం .. కాపీ ఎక్కడ దొరుకుతుంది చెప్పండి ..ప్లీజ్!
మీ ప్రతి పోస్ట్..ని నేను నా మనసుతో చదువుతాను.
అందుకే నా కామెంట్ తప్పకుండా ఉంటుంది. అలవాటైన కామెంట్ అనుకోకండి ..ప్లీజ్!!

సామాన్య said...

వనజ గారూ

స్పందనకు చాలా కృతజ్ఞతలు.అలవాటైతే అభిమానం పెరుగుతుంది నాకు.అడ్రెస్ మెయిల్ చెయ్యండి మీకు

పుస్తకం పంపుతాను.

తృష్ణ said...

చాలాబావున్నాయి మీ ఆకుపచ్చని కబుర్లు..!
ఏదైనా సాధించాకా కలిగే తృప్తి ముందు అందుకు అడ్డంకులైన కష్టాలు,చిరాకులన్నీ దూది కంటే తేలికైపోతాయి !మీ పి.హెచ్.డి పరిశోధన త్వరగా ఫూర్తవ్వాలని ఆకాంక్ష.

సామాన్య said...

తృష్ణ గారూ ! ఎలా ఉన్నారూ ?

థాంక్ యు .

నా పీ హెచ్ డీ అయిపొయింది .

ఎంఫిల్ పదేళ్ళకి ప్రచురించాను

ఇక పీహెచ్ డీ ఎప్పటికి చేస్తానో కదా అనుకున్నాను .అంతే !

తృష్ణ said...

ok..got it..:)